نیا پاکستان بنانے والی تحریک انصاف میں اب نیا کیا؟

نصرت زہرہ انصاری

تحریک انصاف میں نیا کیا ؟ گزشتہ دس سال میں تبدیلی کا نعرہ بہت مقبول ہوا ۔۔ تحریک انصاف جیسی جماعت باریاں لینے والوں کے مقابلے میں مضبوط جماعت بن کر ابھری ۔ ملک کے نوجوانوں نے اس جماعت سے بڑی توقعات وابستہ کرلیں۔ یہی وجہ تھی کہ دو ہزار تیرہ کے انتخابات میں تحریک انصاف کی مقبولیت کا جو ریکارڈ قائم ہو ا تھا اس کی مثال کسی دوسری جماعت کو حاصل نہ ہوئی ۔

دو ہزار تیرہ میں تحریک انصاف کی حمایت کرنے میں نوجوانوں کی بڑی تعداد آگے آگے تھی ۔ خیال تھا یہ نئی جماعت ہے، نئے چہرے آئیں گے نیا پاکستان بنائیں گے۔ پی ٹی آئی کا منشور بھی کچھ ایسا ہی تھا یہ ہی وجہ تھی کہ ووٹ ڈالنے نوجوانوں کی بڑی تعداد پہنچی ۔۔ لمبی قطار میں موجود لوگ بھی ہم خیال نکلے اس کے باوجودکئی حلقوں میں نتائج برعکس آئے ۔۔ البتہ خیبرپختونخوا والوں نے تبدیلی قبول کرلی۔

پھر کچھ یوں ہوا کہ جس پارٹی کیلئے اور کپتان کیلئے لوگ جان دیتے تھے ۔۔ وہ آہستہ آہستہ منحرف ہونے لگی کیونکہ نئی پی ٹی آئی میں پرانے چہروں کی تو جیسے لائن لگ گئی۔ بریکنگ نیوز آنےلگی کہ ن لیگ کا فلاں کھلاڑی بن گیا ۔۔ پیپلزپارٹی کا جیالا پی ٹی آئی میں آگیا مگر یہ بات سمجھ میں نہ آئی کہ جو دوسری جماعتوں کے چور لٹیرےتھے کیا وہ پی ٹی آئی کی لانڈری میں دھل کر یکدم صاف ہوگئے؟ کیاپی ٹی آئی نےدیکھا انہوں اپنے سیاسی دور میں عوام کے لئے کوئی کام کیا بھی یا صرف اپنے اکاؤنٹ بھرے ۔

پھر دیکھنے میں آیا کہ ن لیگ کی حمایت کرنے والے جنوبی پنجاب کے سیاسی رہنماؤں نے پانچ سال اقتدار کےمزے لوٹے اورجب انتخابات دوہزاراٹھارہ کا وقت قریب آیا تو جنوبی پنجاب صوبے کا نعرہ لگا کر قلابازی کھالی اور پی ٹی آئی والے بن گئے۔ مگر یہاں بھی یہی سوال ذہین میں آیا کہ یہ لوگ پانچ سال تک خاموش کیوں رہے ؟ پانچ سال تک کیوں اسمبلی کی ساری مراعاتیں لیں؟ْ کیوں احتجاج نہیں کیا؟حکومت کا حصہ ہوتےہوئے کیوں صوبے کا مطالبہ نہیں کیا ؟

یہ سارے وہ سوال یقینا ً تحریک انصاف کی جھولی میں گرے مگر کوئی جواب دینے والا سامنے نہیں آیا ۔ اگر نظرڈالی جائے توتحریک انصاف میں شامل ہونے والوں میں فرودس عاشق اعوان، شفقت محمود، شاہ محمود قریشی، بابراعوان، راجہ ریاض، ندیم افضل چن، نذر محمد گوندل،صمصام بخاری، فواد چودھری، مصطفیٰ کھر، امتیاز صفدر وڑائچ، اشرف سوہنا، نور عالم خان اور رانا آفتاب خان شامل ہیں۔

ق لیگ سے جہانگیر ترین، عامر ڈوگر،علیم خان، غلام سرور، ظہیرالدین بابر، طاہر صادق، ریاض فتیانہ اورسعید ورک تحریک انصاف کا حصہ بنے۔ اعظم سواتی، فیاض چوہان، سمیع الحق بھی تحریک انصاف شامل ہوئے۔ اختر کانجو، لیاقت جتوئی، ممتاز بھٹو، چودھری سرور اور رمیش کمار  بھی اپنی جماعتوں سے وفاداریاں تبدیل کرکے کپتان کے ہمنوا بن گئے۔

تحریک انصاف نے عامرلیاقت اور رشید گوڈیل کو بھی اپنی آغوش میں لے لیا۔ ان سب ناموں کو پڑھ کر یقینا میرے ذہین میں تو کم سے کم یہ سوال آتا ہے کہ تحریک انصاف نیا پاکستان بنانا چاہتی ہے لیکن نیا پاکستان بنانے کیلئے پرانے چہروں کی کیا ضرورت تھی؟  آخر اب تحریک انصاف میں بھی نیا کیا ہے ؟  جو دو ہزار اٹھارہ میں اس کو ووٹ ملے۔ کہیں یہ اناڑی پن اور پرانے چہرے شکست کا باعث نہ بن جائیں۔

مندرجہ بالا تحریر ویب سائٹ کی ایڈیٹوریل پالیسی کی عکاس نہیں اورویب سائٹ کا بلاگر کی رائے سے متفق ہونا ضروری نہیں۔

Reach the writer @Zehransari